عايزة اتجوز

موضوع: عايزة اتجوز الخميس 26 أغسطس 2010, 7:18 pm

عايزة اتجوز

سموا بقى كده وخليكم معايا، إنتم عارفين طبعاً إن موضوع الجواز والعرسان والتأخر في الجواز موضوع حساس حبتين، وما بتلاقوش حد يتكلّم فيه بصراحة، خصوووصاً البنات، ما هي البنت اللي تتكلّم في المواضيع دي بصراحة هيتقال عليها يا إما إنها بنت قليلة الأدب وما اتربتش، يا إما إنها واحدة مسروعة على الجواز، يا إما إنها واحدة بايرة ومش لاقية حد يتجوّزها.. صح؟

ده كلام هند صبري –أو غادة عبد العال مؤلفة كتاب "عايزة أتجوز"- في مسلسلها اللي بيحمل نفس الاسم.. عايزة أتجوز، واللي منكم -لا قدّر الله- مش بيتابع التليفزيون، فأحب أدي له فكرة بسيطة عن المسلسل.

مسلسل "عايزة أتجوز" بدأ أساساً بمجموعة مقالات على مدونة الكاتبة غادة عبد العال، مقالات اجتماعية ساخرة، بتضحك وتضحّكنا فيها على المجتمع اللي بيرفض إن البنت تتكلم عن الجواز أو في الجواز، لكن بيوافق إنه يحاسبها على قعدتها في البيت من غير جواز، غادة بتتناول أيضاً في مقالاتها الصراع اللي بتدخله البنت كل يوم؛ بحثا عن عريس مع إن النتيجة دائما.. مافيش.

الكلام ده تحوّل من مجرد مقالات على مدونة "غادة"، إلى كتاب في أيدي القراء، ثم مسلسل بنفس الاسم (عايزة أتجوز) واللي بتقوم ببطولته الرقيقة هند صبري، اللي نجحت في إنها تنقل سيناريو غادة عبد العال بنفس خفة الدم، وهنا لازم نعمل ستوب ونسأل سؤال صغير..

هل العنوسة سهلة وعادي.. بالظبط زي أكل الزبادي؟
عزيزتي مروة أو هناء أو منة أو رنا أو نجلاء أو أيا كان اسمك أنتِ يا من تسلل عمرك حدوده الثلاثينية، وتجاوز الخط الأحمر -للأسف المجتمع هو اللي لوّن الخط ده مش إحنا- لقد منحك المجتمع لقب "عانس"، وأصبحتِ نموذجاً للبنت اللي بتتكلم عنها هند صبري، وواحدة من 15 مليون بنت غادة عبد العال نفسها قالت إنها بتمثّلهم وبتتكلم عن معاناتهم، بتتفرجي على المسلسل؟ جميل، يا ترى بتقدري تتعاملي مع الواقع بنفس السخرية دي؟ يا ترى بتقدري تحوّلي واقع -البنات بيقولوا عليه مأساوي- لواقع ساخر زي ما غادة عبد العال ومن بعدها هند صبري قدروا يعملوا؟ ولا الوضع مختلف واللي إيده في المية مش زي اللي إيده في العنوسة؟

اكتئاب عام.. اللون الأسود هو اللون الرسمي لهن.. كل شيء في الحياة بات مثل الأكل الدِّلِع مالوش طعم.. ده كان رأي أغلب البنات اللي سألناهم واللي قالوا كمان إن حياتهم بتتحوّل لجحيم في كل لحظة بيتسألوا فيها السؤال التقليدي: متجوزة يا حبيبتي؟ لا يا طنط.. يبقى أكيد مخطوبة؟ ادعي لي، يا ضنايا يا بنتي... إلى آخره.. نظرة الأم الحزينة لها.. إحساس الكسرة لدى الأب.. كل دي فُرَش بتساعد في تلوين حياة البنت بلون العنوسة الرسمي (الأسود).
ونسيبكم مع رأي "أ.ف." –شابة في منتصف عقدها العشريني- في نظرية "العنوسة سهلة وعادي.. زي بالظبط أكل الزبادي": "صدقني فيه ناس كتير بيتعاملوا وكأن القصة –أي الجواز- مش فارقة معاهم.. بس هي فارقة معاهم جدا، وبيموتوا من جوه كل يوم بسبب الموضوع ده، لا.. أنا آسفة.. كان بودّي أقول لك إن الموضوع عادي.. بس هو مش عادي خالص".

الأسود هو اللون الرسمي للبنت "العانس"بتسألني عن نفسيتي.. اتدمّرت مع ثقتي في شخصيتي!
"البنت بتقعد تسأل نفسها: اشمعنى صحابي اتجوزوا؟ هما أحسن مني في إيه؟ طب أنا أوحش منهم في إيه؟؟"، وده كان كلام "ر.ن." شابة مقبلة على الحياة، ولكن صدمها مجتمعها المحيط، صدمها أصدقاء وأقارب فرقوا عنها في العمر بسنين، وما زالوا بعد "مش متجوزين" وعن حالتهم النفسية حكت "ر.ن."؛ فالرغبة الحادة للبنات -خاصة في أواخر العشرينات وبداية الثلاثينات- في الزواج ليست رغبة في الزواج في حد ذاته، لكن رغبة في تحقيق الذات، وإعطائها ثقة بنفسها بأنها "كاملة ومش ناقصها حاجة"، ولكن إن لم يحدث ذلك؟؟!!

هنا تكون المشكلة، وهنا يكون الأثر النفسي بالغ الشدة؛ لأن البنت لا تعتبر تأخر زواجها حتى هذه اللحظة نتاج ظروف اجتماعية صعبة يعاني منها الشباب مثلا، أو نتاج عدم توافر العريس المناسب لها حتى الآن، لكنها تقوم بعمل ربط مباشر بين عدم زواجها من ناحية وجود عيب أو نقصان بذاتها من ناحية ثانية، هذا النقصان يطاردها أينما ذهبت، وبالتالي تنعدم ثقتها في نفسها، وأحيانا تنزوي على روحها، وتأخذ كلام أي شخص على محمل السخرية منها ومن وضعها الاجتماعي الذي لم تكن مسئولة عنه بالمرة، ويظل هذا السؤال المؤلم يطاردها: أنا ناقصني إيه؟؟؟

طيب نرجع نقول تاني.. عزيزتي مروة أو هناء أو منة أو رنا أو نجلاء أو أيا كان اسمك أنتِ يا من تسلل عمرك حدوده الثلاثينية وتجاوز الخط الأحمر، ممكن نفتح مع بعض دفتر الصراحة ونسجّل فيه أسامينا ونقول الحقيقة.. إحنا.. -لاحظ الخط أسفل "إحنا"- يعني أنا مش باتكلم على أهلنا ولا أهل العرسان اللي جم ومشيوا، ولا باتكلم كمان على المجتمع، إحنا كبنات، مش أحيانا بنكون مسئولين عن الوضع اللي إحنا وصلنا له دلوقتي، سامع المودموازيل اللي هناك بتقول لي إزاي؟.. أقول لك.. كده مثلا..

مش مهم يكون حبّيب أو حساس.. المهم يكون مستوى وابن ناس
"أنا ما اتجوزش واحد مستواه الاجتماعي أقل مني أبداً ولو بفرق صغير حتى، أنا ممكن أتنازل عن عيوب في شخصيته، ممكن أتنازل عن المستوى المادي لكن عن أصله مش ممكن".. ده كان رأي "د. ك." اللي رفضت بأي شكل إنها تقدّم تنازلا ولو 1 في المليون فيما يتعلق بأصل العريس وفصله.. وإحنا كمان لازم نسأل: إذا كان العريس إنسانا محترما ومتعلما وراقيا -هو في حد ذاته- لكن أسرته بسيطة، وإن كانت عملت إنجاز بإنها علّمته وقدّمته للمجتمع بهذا الشكل، فهل نحاسبه على أهله اللي ما اختارهمش؟

مش يمكن الرفض المتكرر من قبل البنات للعرسان في بداية العشرينات هو اللي بيوصلنا للوضع ده في بداية الثلاثينات، يعني في البداية: "أنا لازم أكمّل تعليمي عشان ما يعطّلنيش" ويمكن التعليم يمدّ بماجستير، وبعدين: "أحقق نفسي في الشغل الأول"، وبعدين "أنا ما اتجوزش جواز صالونات"، وبعدين: "مش لاقية الراجل اللي يليق بمستواي اللي وصلت له"، ويسرقنا قطار العمر وإحنا مش حاسّين.

رفضنا المتكرر للعرسان هو اللي بيوصلنا للوضع دهمعقولة ممكن البنت تتخلى عن عريس هي مقتنعة بيه لمجرد إنه مش قادر يسدّ في كل المجاملات الاجتماعية -اللي هي كتييييير جدا بالمناسبة- وما جابش فانوس رمضان أو عروسة المولد أو هدية عيد الأم أو كحك عيد الفطر أو لحمة العيد الكبير أو ما عيّدش على خطيبته بمبلغ محترم فبقى مش محترم!!.

مش معقول كمان إننا نرفض زوج مناسب وعلى خُلق ودين لمجرد إن "سنه أكبر مننا بـ8 سنين أو 9 سنين"، وممكن ما يكونش فيه تفاهم.. لاحظي كلمة "ممكن"، أي أننا أخذنا قرارا على أساس احتمال هو نفسه يحتمل الصواب أو الخطأ، أو مثلا عشان مرتبه أقل من 2000 جنيه رغم أننا فيما بعد بنرضى بأقل من الـ2000 جنيه هذه.

س سؤال: هل حواء هي من تسبّبت في عنوستها؟
ج جواب: ..........................

وبالنسبة لآدم..

ممكن تتقدم لبنت عدّت الـ30؟
ج جواب: .................

موضوع: رد: عايزة اتجوز الجمعة 27 أغسطس 2010, 7:00 am

موضوع جميل اوى يا مون كان نفسى اتكلم فيه
وهى مش مشكله واحده بيتسبب فيها الموضوع ده فى كذا مشكله
اولها حال الشباب اللى وصلوله دلوقتى الشباب ظروفهم صعبه وحالهم بالبلا مطلوب منه شقه وموبيليا واجهزه ده غير فترة الخطوبه والهدايا والمناسبات اللى بيجبها والشباب دلوقتى يادوب بتكفى نفسها بالعالفيه ومش عارفين يعملو ايه
يعنى الشاب علشان يجوز بيبقى عايز 5,6 سنين ويجى فى نص المده تحصل مشاكل وكعبله بين اهل العروسه والمتعوس الشاب ويفركشو الخطوبه ساعتها الشاب يحبط وما يفكرش فى الجواز تانى وكله بيشوف صحابهم حالهم عامل كده يقولو انا كمان مش متجوز ويتعقد ويقول يا عم انا اعيش حياتى احسن اعيش ملك وبصرف هنا وبجيب هدوم واللى انا عايزه بلا هم كلها هموم وركبت الشباب يا جماعه خلتهم كده
فا الضغط ع الشباب بقه جامد اوى
غير بقه اللى ربنا بيكرمه بواحده بنت حلال واهلها ناس كويسه وربنا بيتمملهم على خير
وفى سبب بقه اللى قالته مون فى الموضوع البنات اللى ليها تحكمات ودماغهم مش مظبطه وبيضيعو من ايديهم الشباب فى الهوا
وفى حاجات كتير بقه انا ما ذكرتهاش ومش مجمعها دلوقتى
وبالنسبه للسؤال اللى مون سئلته مفيش مشاكل بالنسبالى اتجوز واحده فى التلاتين مفيش مشاكل
وشكرا اوى يا مون على الموضوع الجميل ده
تقبلى تحياتى

موضوع: رد: عايزة اتجوز الجمعة 27 أغسطس 2010, 1:34 pm

جميل جداا موضوع المناقشة بتاعك ده يا مون
وعلى فكرة ده كان مشروع البحث بتاعى فى البكالورويوس واخدت فيه امتياز الحمدلله

س سؤال: هل حواء هي من تسبّبت في عنوستها؟
ج جواب: ..........................

الاجابة : احيانا فعلا البنت بتكون سبب فى عنوستها زى مثلا اللى ليها شروط معينة فى الشاب او الزوج اللى بتختاره اللى عايزاه مستوى تعليمى عالى واللى عايزاه مستوى اجتماعى عالى واللى عايزة شقة وعربية وشبكة مش عارفة بكام واللى طالبه انه يكون وسيم ورومانسى
وبينسوا خالص الدين والاخلاق والمهر مش عارفة يكون قد ايه وفرحى يتعمل فين وكعبلة من دى كتييييير بتخلى الشباب طبعا ميرحولهاش ومحدش منهم يقرب لان طلباتها كتييير زائد كتر رفض البنت للى بيتقدموا لها واصرارها على طلبات معينة بتخلى محدش يقرب منها ودى اللى بيسموها بالبلدى ( من كتر خطابها بارت ) دى حاجة

من الاسباب التانية وكويس انك اتاحت لى فرصة انى اتكلم فيها
العادات والتقاليد ودى انا هعملها ان شاء الله موضوع خاص بيها من ضمن مشاكل جنوب الصعيد يعنى احنا عندنا مثلا فى الصعيد التمسك بالعادات والتقاليد اينعم ابتدت تختفى بس مازالت موجودة
يعنى البنت مينفعش تتجوز الا ابن عمها او قريبها او من عيلتها
ومينفعش تتجوز حد من برة العيلة حتى ولو مستواه العلمى والاجتماعى اعلى من قريبها وده طبعا بيعمل مشكلة لان البنت لما بترفض لا بتتجوز ده ولا ده وبتفضل انها تفضل كده
ومن الاسباب التانية برده تفاهة شباب اليومين دول يعنى تبصى تلاقى الشباب مهتم بالجل والسبايكى وينسى ابدا الشهامة كده والرجولة
تلاقى الشاب من دول مايص وميعتمدش عليه ابداا طيب مين دى اللى هترضى بواحد زيه فى نظرها بيكون عيل مينفعش يبقى اب لولادها
لما تكتر الفئة دى من الشباب البنت بتحبط
وعلى فكرة نسبة العنوسة دلوقتى مبقتش فى البنات بس
بقت فى الشباب كمان لقلة الامكانيات زى ما قال اسلام وصعوبة المعشية

موضوع جميل اوى يا مون وسورى انى طولت عليكم بس بجد لو فضلنا نتكلم عن كل سبب من الاسباب هناخد ساعات طويلة علشان نقدر نوفيه حقه موضوع فعلا يستحق النقاش ومرسى جدا ليكى

موضوع: رد: عايزة اتجوز الأحد 29 أغسطس 2010, 10:26 pm

والله يا اسلام انا شايفه ان الاستسلام للوضع الحالىده شئ مش تمام
يعنى الى فى ايده شغل دلوقتى يمسك فيه
ويحاول ويحاول والله المستعان
وكمان الاهل والبنات يتهاونوا شوايه ويبصوا لجوهر الانسان يبقووا بيشتروا راجل بمعنى اصح
الحياه تعاون ومشاركه
وربنا يوفق الجميع
ميرسى على مرورك الكريم يا اسلام
مرسى ليكى يا هند

عدد المساهمات : 31 تاريخ التسجيل : 22/08/2010

انا متابعه المسلسل وعاجبنى اوى وموضوعك اجمد لانك حولتى المسلسل الى موضوع للنقاش

تعرفي يا موون والله ان الموضوع ما كان بيشغل بالى على الاطلاق اصلا بس بعد ما شفت المسلسل حسيت بحاجه غريبه هو انا ممكن اكون عانس ودى ترمى بكلمه وجارتى تبص عليا بصه غريبه والشماته اشوفها كده عينى عينك ولا ايه
بس برجع وعقلي يقولى ايه عانس دى يعنى لا تصلح للجواز وللخلفه مثلا في امريكا في ناس بتتجوز اصلا بعد 30 وال35
مش عارفه احنا الى متخلفين ولا مجتمعنا مش بقي عنده مشكله ولا شغله غير انه يوزع الالقاب دى عانس وده عاطل ودى .. ودى .. ودى ....
اسئله كتير بترن في عقلي على قد ما المسلسل كان كوميدى بس بيحمل قضيه هامه جدا جدا بتشغل بال 3 تربع مصر كلها
في سؤال عايزه حد يرد عليا فيه

هو انا لو مش اتجوزت هموت ؟ ولا ليه النا محسسنى ان خلقت لكى اتزوج فقط ؟
مش في حاجه اسمها شغل اهل اصحاب عباده اى حاجه نفكر فيها غير الجواز مفيش غيره

هتقولو ان الجاز نص الدين هرد واقول ربنا مش ارد لسه مش جه النصيب اوقف حياتى علشان ربنا رايد ليا حاجه واتأخرت
او حتى ربنا مش ريدها ليا
مش عارفه بجد بداءت احس ان انا غريبه عن الاخرين لما بلاقي بنت عندها 18 سنه سابت التعليم ونزلت تشتغل في مصنع عامله علشان ايه ؟
عريس
شويه شويه هنتنفس عريس وبس

ربنا يصبرنا Sad

*-*-*-*-*-*-*-*-
سؤال: هل حواء هي من تسبّبت في عنوستها؟
ج جواب:لا مش حواء طبعا مجتمعنا والاهل alien

الاهل
عندك شقه ملك ؟

المؤخر لازم يكون .....؟ مبلغ وقدره هو يخاف طبعا يحصل حاجه ويطلقو هيجيب منين !!! silent

المهر لازم يكون بكذا ......؟
الفرح يكون معمول في مكان كذا
والعفش بتاع الشقه يكون خشب مش عارفه ايه وحاجات غريبه اوى
والعريس هيجيب منين ده حتى العيش الى هو بشلن الناس مش عارفه تجيبه الافران كترت والرخيف بقي بربع جنيه والشعل ساكت الطماطم الى هى كان من حوالى اربع خمس سنين 2 ك بجنيه وحلوه اوى كمان بقت 1 بخمسه جنيه و6 جنيه
يعنى علشان تعمل ارخص حاجه في العالم طبق السطله تدفع من 15 ل20 جنيه Mad

الحياه بقت نار وعدد السكان في زياده والشغل مش موجود السبب في العنوسه المجتمع ثم الاهل

وبالنسبة لآدم..

ممكن تتقدم لبنت عدّت الـ30؟
ج جواب: انا مش ام بس ممكن ارد عليكى
مرات اخو خطيبي عندها 34 سنه واتجوز وهى عندها 32 وعادى ولا في اى كومينت Very Happy

» كوميديا انا عاوز اتجوز ياماما