كوميديا انا عاوز اتجوز ياماما

بعدما جاء العريس المنتظر فى الساعه التاسعه وأربعه وأربعون دقيقه ودق جرس الباب حسيت أن الحكايه هتتكبر فى دماغ بابا وناوى يلطعهم شويه ع الباب لطعه بلطعه وكدا يعنى
بس ماما بصت ليه بصه غريبه فيظهر حركت جواه المشاعر الابويه فحن على مش عليهم (شكل الراجل ده عايز يتخلص منى)
وأتنهد وقام وفتح الباب دخلوا ورا بعض طنط شكريه لبسه فستان موديل (عضه الكلب)
ووراها العريس عباره عن بؤ (يعنى فم بالنحوى ) فيه 32 سن وحواليه بنى أدم
( سن يعنى ثووث بالاينجليزى)
اه والله أعرض إبتسامه شوفتها فى حياتى عجبتنى إبتسامته جدا يعنى حاجه بتذكرنى بعجائب الدنيا ال32

فى البدايه قعدنا فى الصالون بنتكلم فى أى حاجه أى حاجه والسلام بعيد عن موضوع الجواز كأنها قعده تعارف يعنى وخلاص
العريس الوسيم اااه منك ياطنط شكريه بيرد على كل الاسئله بأبتسامه واسعه وضحكه مجلجله ومن خلال المغاره المفتوحه أقصد بؤه المفتوح على أخره تقدر تشوف بوضوح اللوز والبلعوم ولو دققت كمان شويه يمكن تشوف الامعاء الغليظه

قلت لنفسى معلش يابت دا الراجل بشوش يعنى ووش سمح بس دا كان أول عريس مايدخليش عليا أيد ورا وأيد قدام كان جايب لفه صغيره كدا كان نفسى من اول ما قعدنا اعرف فيها أيه

هو مشى هو وطنط شكريه من هنا وأنا وبابا وماما اتلمينا ع اللفه من هنا وعملنا حواليها دايره ومافيش حد عايز يمد أيده زى ما نكون من بتوع الاف بى أى ومشتبهين فى شنطه فيها متفجرات الفضول هيقتلنى فمديت أيدى وقتحت الفه الصغنتوته دى لاجد فيها إيييييه؟
؟؟؟؟؟؟؟؟؟؟؟؟؟؟؟ أصبروا ها قولكم فى الاخر

بابا بصلى وقالى: أيه ده
ما عرفش يابابا زى مانت شايف
ماما قالت له: ماحنا مانعرفش العرسان بيجيبوا إيه فى المناسبات دى يمكن هى دى الموضه

بابا وقف يبصلنا ويبص للفه وبعدين أتنهد باستسلام وهز كتفه وقال : يمكن !

تانى مره هاتقولولى: ليه طيب ماتكلمتوش فى موضوع الجواز فى أول جلسه وخلصتوا؟

ياجماعه هو مش معقول كل ماحد بيجى ليا يمشى من أول مره الناس بدأوا يتكلموا ويقولوا مادام العرسان بيمشوا من أول مره يبقى البنت فيها عيب
قولنا نقسم أى جلسه بعد كدا على نصين كده ممكن يقتنعوا أننا مش متفقين وأننا إحنا اللى مشيناه وبابا هو اللى دحرجه ع السلم
غباء؟!
أنا عارفه انو غباء بس هنعمل إيه ؟!

بس الجلسه الاولى المره دى المفروض إنها مبشره وباستثناء التأخير الى حصل عدت من غير خسائر كبيره

ولما عملنا معاد تانى مع العريس إحنا ما أنتظرناش الساعه زى المره اللى فاتت لاننا أدركنا إن العريس ماشى على توقيت دبى فبدأنا نستنى أبتداء من الساعه تسعه دحنا ناس مرنين أهه ومافيش بعد كده

ضرب الجرس دخلوا الاتنين ورا بعض نفس المنظر بتاع المره الاولى باستثناء فستان طنط شكريه المره دى كان موديل (رفسه الحمار)
بصيت على أيد العريس يمكن يكون المره دى جايب حاجه غير المره اللى فاتت إلا مفيش حاجه ماعلينا قعد العريس ابو إبتسامه زى التمساح
بابا بيبتدى هو كمان يابتسامه :إزيك ياأبنى
العريس :هههههههههه الله يسلمك ياعمى
ماما بابتسامه واسعه: ما كانش له لزوم تتعب نفسك وتجيب معالك حاجه المره اللى فاتت
العريس:ههههههههههههه دى حاجه بسيطه ياطنط
حاجه من عندنا
ماما :من عندكو؟! هى دبى فيها حاجات زى دى؟
العريس :هههههههههههه دبى ؟! دبى إيه ياطنط ؟
قصدحضرتك الرياض؟
ماما: الرياض؟

لقينا كلينا بصينا لطنط شكريه اللى بانت محرجه كدا شويه وبعدين أبتسمت أبتسامه عصبيه كدا
وقالت: ماهوووو اصلى باين مابقتش أسمع كويس زى زمان ههه السن بقا معلش
رجعنا بصينا له وهو قاعد مبتسم

بابا: يعنى حضرتك فى الرياض
العريس :ههههههه أه عايش وبشتغل هنالك
بابا: وعامل أيه هناك ؟ مبسوط؟
العريس:هههه جداجدا
بابا: وعلاقتك كويسه مع السعوديين هناك؟
العريس:ههه سعوديين؟ سعوديين أيه ياعمى؟ أنا معرفش سعوديين
بابا :أزاى يعنى عايش فى السعوديه ومتعرفش اى سعوديين؟
العريس:هههههه سعوديه؟ سعوديه ايه ياعمى ؟

(طنط حشريه بقا فى اللحظه دى بتشيل شنطتها وماشيه)

طنط شكريه الحشريه: اسيبكم أنا بقا طالما خدتوا على بعض أبقوا طمنونى بقا

المره دى ماما وقفت لها: استنى ياشكريه أقعدى رايحه فين؟ استنى هنا اما نشوف الحكايه ايه؟
بتقوللى ايه بقا ياحبيبى؟ عايش فى الرياض ومتعرفش السعوديه؟
العريس:هههه أيوة ياطنط يعنى هاعرفها منين؟
ماما: إزاى يابنى أدم مالرياض فى السعوديه

العريس :ههههههههههههههههه ااااااه أنتو فاكرينى من الرياض اللى فى السعوديه؟

كلنا فى صوت واحد أومال إيه؟

العريس : لا ياجماعه انا من الريااااااااااض
الرياض اللى فى المنصوره
اللى جنب منيه النصر وميت سلسيل ( ميت سلسيل دى بلدى أنا[/
b])
[b]ماما:الرياض اللى فى المنصورة ؟ أنا مش فاهمه حاجه
العريس:هههــ
ماما:ودينى لو كملت الضحكه دى لتكون أخر ضحكه فى حياتك فهمنى بتقول ايه؟

العريس شكله بدأ يخاف:طيب طيب مش هاضحك خلاص ياطنط الرياض دى قريه فى محافظه المنصورة
زى ماقلت قبل كده اللى جنب منيه النصر وميت سلسيل ( ميت سلسيل دى بلدى أنا)

ماما:نعمممممممممممممممم أومال ايه دبى وشوبنج ومش عارفه أيه؟

بابا أتدخل: طب معلش معلش فهمنى بقا بالمره قبل ما أولع فيك وفى البنى أدمه اللى جايباك سيادتك بتشتغل إيه بالظبط ؟ معيد فى تربيه رياضيه ولا فى هندسه؟

العريس قام من مكانه فجأه وأتجه للباب الخارجى وخلا رجل جوا ورجل برا وبابا ماسكه من ذراعه بالقوة وماما ماسكه طنط شكريه الحشريه من قفاها

العريس : صراحه ياعمى انا كنت فى الاول فى كليه تربيه رياضيه وبعدين بقيت معيد يعنى قعدت أعيد سنه ورا سنه لحد مارفدونى من الكليه وبعدين حولت لمعهد كفاءه إنتاجيه

بابا وماما ماسكين الاتنين وعاوزين يفترسوهم زى مصاصين الدماء لما بيفترسوا ضحاياهم وطلعوهم برا الباب والعريس هو وطنط شكريه الحشريه مرسوم على وشهم الفزع والرعب ووقفنا كلنا ع السلم ونفضنا ايدينا وقفلنا الباب وطفينا النور طبعا

ـــــــ طبعا لسه عاوزين تعرفوا اللفه اللى العريس كان جايبها معاه فى أول مره كان فيها إيه؟
نص كيلو بسبوسه من محل حلويات نيو سويتس اللى ليه فرع فى الرياض وميت سلسيل ومنيه النصر والمنزله
ــــــــــــــــــــــــــــــــــــــــــــــــــــــــــــــــــــــــــــــــ
أعتذر لو كنت جرحت مشاعر اى فتاه ولكن هدفت من هذا الحوار أن أرسم ضحكه على شفابف أخواتى البنات فتقبلوها منى
وعلى رأى بنت الجيران عندنا فى الحاره

(طلــــــعت فوق السطوح .... هز الــــهوا كـــمى)
( كل البنات أتجوزت....... وأنا قاعده جنب أمى)

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
حقوق الطبع والنشر محفوظه للمؤلف © 2009
محاسب محمد حامد